ازاي تكتشف شغفك في الحياة ؟!

مع كل الكلام اللي بتقابله عن ازاي تحسن من نفسك أو تنجح في حاجة بتعملها دايما بنسمع 
“follow your passion”
لكن محدش اتكلم عن ازاي تلاقيه لو انت مش عارف ايه شغفك في الحياة، تكتشفه ازاي اصلا علشان تمشي وراه?!

– قبل أي حاجة متنطش بدماغك بعيد وانت بتحاول تكتشفه و تروح لمشروع كبير أو وظيفة، انت محتاج تركز على البداية، الخطوات الصغيرة لأن هي حاجة زي puzzle كدة ومش هتبانلك غير وانت بتحاول تحلها.

–محتاج تسأل نفسك كام سؤال الأول و تجاوب في ورقة قدامك
1) إيه اللي ممكن تتكلم عنه كل يوم من غير ما تحس انك زهقت أو تعبت!
2) ايه اللي بتحب تعمله!
3) ايه المنتجات او الخدمات اللي بتجذبك أو مهتم بيها!
4) مين الناس اللي بتعجبك في شغلها أو طريقة حياتها و ليه !?
5) نفسك تحقق إيه قبل ما تموت!
6) إيه نوع المشاكل اللي انت بتحلها كويس اوي?!
بعد ما تجاوب على الأسئلة دي اكيد هتلاحظ موضوع معين شاغلك ده اللي هيقولك انت شغوف بإيه!

– أول ما تلاقي الموضوع او الشئ اللي شايف فيه متعتك، ركز عليه أياً كان بقى ( رياضة- موسيقى- قراءة- سفر- فن – تدريس …) مهما كان جزء صغير فهو مرتبط بحاجة أكبر و الخطوات اللي بعد كدة هتوصلهالك و تكتشف شغفك فيها، لو بصينا لأي قصة شخص ناجح هتلاقيها بدأت بخطوة بسيطة زي كتاب أو محاضرة و جيه منها الالهام للنجاح اللي وصلوله في النهاية.

– كتير مننا عارفين شغفهم فين بس دافنينه علشان المجتمع مش شايفها ‘مهنة’ فا بيبعدوا عن شغفهم بعد ما لاقوه و يدورا على اللي يقدر يكسبهم فلوس، و لازم تعرف الفرق بين شغلك و هوايتك بس مش غلط ابدا انك تخلى مجال شغلك مرتبط بهوايتك.

– لازم تكون فاهم النجاح بالنسبة لك معناه ايه، مش الناس شايفة النجاح هو ايه، أمشي ورا قلبك و اعمل اللي يناسبك أنت وكمله للآخر و متدفنش شغفك.